Saberes do Monte opera en cinco zonas piloto de montaña en Galicia: Serra do Xistral, Negueira de Muñiz, Serra dos Ancares, Serra do Courel e Serra da Groba. En conxunto, abarcan máis de 22.000 hectáreas de alto valor natural, boa parte integradas na Rede Natura 2000.

Os 12 concellos onde se desenvolve a iniciativa comparten un valioso patrimonio natural e cultural vinculado a actividades como a gandería extensiva, a apicultura e a xestión tradicional do cabalo salvaxe. Ao mesmo tempo, enfróntanse a desafíos comúns, como o abandono rural, a despoboación, a perda de biodiversidade, o risco de incendios forestais e a baixa rendibilidade destas actividades.

O proxecto traballa xunto ás comunidades locais para promover un modelo de desenvolvemento que combine a conservación da natureza, a participación local e novas oportunidades para vivir e traballar no territorio, valorando a contribución daqueles que o coidan e o manteñen.